Тасвирлама
Татарстан Республикасының халык язучысы Зөлфәт Хәкимнең «Серле тәңкә» романында татар егете Равилнең яшүсмер чагында чегән кызы Лаурага гашыйк булуы һәм, шактый еллар узгач та, ул сөюнең сүрелмәве, алай гына да түгел, мәхәббәте аркасында, үзе дә сизмәстән, криминаль дөнья шаукымына килеп кабуы мавыктыргыч итеп тасвирлана.
Әсәрдә, тулаем алганда, узган гасырның 80–90 нчы еллары сурәтләнсә дә, автор Казан ханлыгы белән Габделлатыйф хан, Гәүһәршад бикәләр идарә иткән чорларга мөрәҗәгать итә, дөнья буйлап гизүче чегән халкының тарихын барлый.
Әсәр 2023 елда Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе тарафыннан үткәрелгән конкурсның «Роман» номинациясендә 2 нче урынны алды.