Зәйниев Илгиз Газинур улы

Зәйниев Илгиз Газинур улы 1987 елның 23 маенда Татарстанның Аксубай районы Карасу авылында туа. Мәктәптә укыганда шигырь, әкият язу белән мавыга, хикәя жанрында да каләмен сынап карый. 2002 елда («Җәйге төннәрдә...») дигән беренче пьесасын яза. 2004 елда И.Зәйниев, мәктәпне тәмамлап, Казан дәүләт мәдәният һәм сәнгать университетының актерлык бүлегенә укырга керә. Уку белән параллель рәвештә язуын да дәвам итә. Беренче курста «Яңа татар пьесасы-2004» конкурсында катнашып, лауреат исеме һәм Мәдәният министрлыгы бүләгенә лаек була («Ай кызы» музыкаль драмасы). 2005 елның октябрендә Уфа «Нур» театрында И.Зәйниев пьесасы буенча куелган беренче спектакль - «Туйга ничә көн кала.» музыкаль комедиясенең премьерасы уза (режиссер - Ф.Бикчәнтәев). 2006 елның 14 маенда Г.Камал исемендәге Татар дәүләт академия театры сәхнәсендә аның пьесасы буенча куелган «Мәхәббәт турында сөйләшик» («Әйткән идең.») моңсу комедиясенең премьерасы уйнала (режиссер - Р.Фазлыев). Шул ук елның сентябрь аенда Г.Кариев исемендәге Яшь тамашачылар театрында «Амазонка һәм Айдар» музыкаль комедиясе (режиссер - Р. Әюпов), ноябрьдә Г. Камал исемендәге Татар дәүләт академия театры сәхнәсендә режиссер Р. Фазлыев тарафыннан «Суган чәчәге» исемле сагышлы комедиясе («Яңа татар пьесасы-2006» конкурсының I премия лауреаты) куела. Шул елның 24 декабрендә Г. Кариев исемендәге яшь тамашачылар театрында «Урман club» тамашасы уйнала (режиссер - И.Камалиев). 2009 елда И.Зәйниев татар драматургиясен үстерүгә керткән казанышлары өчен М. Җәлил исемендәге Республика премиясенә лаек була. 2007 елдан - Татарстан Язучылар берлеге әгъзасы.