Шәрәпова-Җамсшетдинова Йолдыз Әдип кызы (Йолдыз)

Шәрәпова-Җамсшетдинова Йолдыз Әдип кызы (Йолдыз) 1962 елның 10 апрелендә Татарстанның Буа районы Яңа Тинчәле авылында туа. 1979 елда Яңа Тинчәле урта мәктәбен тәмамлаганнан соң, укуын Казан дәүләт университетының филология факультетында дәвам иттерә. 1984 елда университетта укуын тәмамлап чыккач, бер ел «Ялкын» журналында, аннары бер ел Биектау район газетасында корректор булып эшли. 1986 елдан - «Яшь ленинчы» (хәзерге «Сабантуй») газетасы хезмәткәре, соңгы елларда редакциянең әдәбият бүлеген җитәкли. Йолдыз - әдәби иҗатын тулысынча балалар дөньясына багышлаган каләм иясе. 1994 елда аның «Антенналы бәрәңге» дигән беренче шигъри җыентыгы дөнья күрә һәм укучылар арасында үткәрелгән «Ел китабы-94» бәйгесендә икенче урынны яулый. Хәзер Йолдыз - балалар күңеленә хуш килгән 5 китап авторы («Колаклы коймаклар» (2003), «Җавапсыз сорау» (2007) һ.б.). Аның күп кенә шигырьләре мәктәп дәреслекләренә, хрестоматияләргә кертелә, балалар язучыларының күмәк җыентыкларында урын ала. Шагыйрә 2002 елда «Бәллүр каләм» бүләгенә лаек була. 2004 елда Йолдызга «Колаклы коймаклар» китабы өчен Татарстан Язучылар берлегенең А.Алиш исемендәге әдәби премиясе бирелә. 1995 елдан - Татарстан Язучылар берлеге әгъзасы.