Кожевникова (Баубекова) Роза Хәби кызы

Кожевникова (Баубекова) Роза Хәби кызы 1950 елның 19 декабрендә Әстерхан өлкәсенең Красноярск районы Дельта станциясендә туа. Урта мәктәпне тәмамлагач, комсомол путевкасы белән Татарстанга - Түбән Кама шәһәре төзелешенә эшкә килә, 1969-1971 елларда Казан дәүләт университетының журналистика бүлегендә укый, 1972-1977 елларда, Татарстан Язучылар берлеге рекомендациясе буенча Мәскәүгә китеп, М.Горький исемендәге Әдәбият институтының тәрҗемәчеләр әзерләү бүлегендә махсус югары белем ала. 1977-1983 елларда Р.Кожевникова Казандагы төрле матбугат органнарында корректор, әдәби хезмәткәр һәм корреспондент вазифаларын башкара. 1983-1989 елларда ТАССР Дәүләт телевидение һәм радиотапшырулар комитетында әдәби-драматик тапшырулар мөхәррире булып эшли. 1989 елда «Идель» журналына мөхәррир булып эшкә күчә. 1991 елдан әлеге журналның баш мөхәррир урынбасары вазифаларын башкара. Р.Кожевникова рус телендә иҗат итә. 1985 елда аның «Гроздь рябины» дигән беренче мөстәкыйль китабы, аннары «Зимний дождик» (балалар өчен, 1988), «Два голоса» (1990), «Меж светом и тьмой» (2000) исемле шигырь җыентыклары басылып чыга. Шагыйрә тәрҗемә өлкәсендә дә актив эшли. Аның тәрҗемәсендә С.Хәким, Р.Харис, Н.Арсланов, Ш.Галиев, Р.Фәйзуллин, Зөлфәт һ.б. шагыйрьләрнең әсәрләре рус телендә дөнья күрә. 1995 елда аңа «Татарстан Республикасының атказанган мәдәният хезмәткәре» дигән мактаулы исем бирелә. 2003 елда «Меж светом и тьмой» шигырьләр китабы өчен шагыйрә Казан шәһәренең М.Горький исемендәге әдәби премиясенә лаек була. Р.Кожевникова 2007 елда Казанда вафат була. 1984 елдан - Татарстан Язучылар берлеге әгъзасы.