Фәйзуллина (Тәрҗеманова) Мәрзия Низам кызы

Фәйзуллина (Тәрҗеманова) Мәрзия Низам кызы 1930 елның 11 июнендә Татарстанның Арча районы Шушмабаш авылында туа. Урта мәктәпне тәмамлаганнан соң, 1946-1956 елларда Казанда төрле оешмаларда эшли: халык судында - сәркатип, милиция бүлегендә - тәртип бозучы балаларны тәрбияләү эше инспекторы, Татарстан китап нәшриятында - бухгалтер. 1956 елда балалар бакчасына тәрбияче булып эшкә күчә. Бер үк вакытта читтән торып укып, 1957 елда урта мәктәпне тәмамлый. 1958-1964 елларда М.Фәйзуллина читтән торып Мәскәүдәге М.Горький исемендәге Әдәбият институтында укый. 1955 елда М.Фәйзуллинаның мәктәпкәчә яшьтәге балалар өчен кечкенә генә шигъри җыентыгы - «Салават күпере» дигән беренче китабы басылып чыга. Аннары бер-бер артлы нәниләр өчен «Чәчәкләр сәгате» (1959), «Ике көрәк» (1961) һ.б. шигырь җыентыклары дөнья күрә. Шагыйрәнең Мәскәү балалар нәшриятларында 1963-1965 еллар арасында бер-бер артлы русча тәрҗемәдә зур тиражлар белән «Цветочные часы» (1963), «Стихи» (1964), «Пропала кошка» (1965) һ.б. китаплары басылып чыга. Аның аерым әсәрләре рус теленнән тыш үзбәк, чуваш, украин һ.б. телләргә тәрҗемә ителә. М.Фәйзуллина - Татарстанның атказанган мәдәният хезмәткәре (1990). «Гаилә әлифбасы» (1999) китабы өчен автор 2004 елда Татарстан Язучылар берлегенең А.Алиш исемендәге әдәби премиясенә лаек була. 1965 елдан - Татарстан Язучылар берлеге әгъзасы.