Кутуев Рөстәм Гаделша улы (Рөстәм Кутуй) 1936 елның 11 ноябрендә Казан шәһәрендә күренекле язучы Г. Кутуй гаиләсендә туа. 1955-1960 елларда Казан дәүләт университетының рус филологиясе бүлегендә укый. 1960-1961 елларда - Татарстан китап нәшриятының әдәбияты редакциясендә, 1961 -1963 елларда Казан телестудиясенең әдәби-драматик тапшырулар бүлегендә мөхәррир булып эшли. 1964 елдан - язучы-профессионал. Р.Кутуй рус телендә иҗат итә. Аның әдәбияттагы беренче мөстәкыйль адымнары 50 нче еллар ахырына туры килә. 1961 елда - Татарстан китап нәшриятында «Мальчишки» исемле беренче хикәяләр җыентыгы, 1962 елда «Я иду по земле» исемле шигырьләр җыентыгы дөнья күрә. Аннан соң бербер артлы «Лист земли» (Мәскәү, 1980), «Корни» (Мәскәү, 1982), «Поземка» (1985), «Дождь будет» (Мәскәү, 1963), «Я леплю снежную бабу» (Мәскәү, 1966), «Такая жизнь» (1986), «Свет в осиннике» (Мәскәү, 1988), «Смеюсь, задыхаюсь и плачу» (1996) һ.б. проза һәм шигырь җыентыклары нәшер ителә. Р.Кутуй - балалар өчен язылган китаплар («Золотой олень», «Чудеса в решете» һ.б.) авторы да. Р.Кутуй татар әдипләренең әсәрләрен русчага тәрҗемә итүдә актив эшли. Ул С.Хәким, С.Баттал, Н.Арсланов, Р.Фәйзуллин, Р.Әхмәтҗанов, М.Әгьләмов, Г.Кутуй, Ә.Еники, В.Нуруллин, М.Насыйбуллиннарның әсәрләрен тәрҗемә итә. Р.Кутуй - ТАССРның атказанган мәдәният хезмәткәре (1987). 2005 елда ул - Казан шәһәренең М.Горький исемендәге әдәби премиясенә, ә 2009 елда «Профиль ветра» исемле шигырьләр җыентыгы өчен Татарстан Язучылар берлегенең Г.Державин исемендәге әдәби премиясенә лаек була. Р.Кутуй 2010 елда Казанда вафат була. 1962 елдан - Татарстан Язучылар берлеге әгьзасы.